ამასობაში ალენ გინსბერგის დაბადების დღე გამოგვეპარა. არა უშავს, ნუ მიიტანთ გულთან ახლოს. აი, ეს ახალი თარგმანი დავჭექოთ ხმამაღლა. წაიკითხეთ თუ დრო გექნებათ.

                            ზამთრის ჰაიკუ

თარგმანი ინგლისურიდან: გ. ხასაია გ. წურწუმია

მე არ ვიცოდი ყვავილთა

სახელები –ჩემი ბაღი

უკვალოდ გაქრა.

კოღოს მოვუქნიე

და ავაცილე.

რამ მაიძულა ამის გაკეთება?

ჰაიკუს  კითხვისას

უბედური ვარ

გამოუთქმელს მოწყურებული.

ბაყაყი  ცურავს

წამლის ქილაში:

ზაფხულის წვიმა ნაცრისფერ ქვაფენილებზე.

აივანზე ვდგავარ

შორტის ამარა;

მანქანის შუქები წვიმაში.

კიდევ ერთი

წელი გავიდა – სამყარო

ისევ ისეთია.

პირველი რასაც ჩემ ძველ

ბაღში ვეძებდი

ალუბლის ხე იყო.

ჩემი ძველი მაგიდა:

პირველი რასაც

სახლში ვეძებდი.

ჩემი ბავშვობის დღიური:

პირველი რაც ვიპოვე

ძველ მაგიდაზე.

დედაჩემის აჩრდილი:

პირველი რაც ვიპოვე

მისაღებ ოთახში.

პარსვას მოვრჩი

მაგრამ თვალები, რომლებიც მიმზერდნენ

სარკეში დარჩნენ.

შეშლილი კაცი

გამოდის კინოდან:

ქუჩაში ლანჩის დროა.

ბიჭების დასახლება

სასაფლაოზეა,

ამ ქალაქშიც…

გვერდზე ვწევარ

სიცარიელეში:

ვსუნთქავ ცხვირით.

მეთხუთმეტე სართულზე

ძაღლი ხრავს ძვალს –

ტაქსების კივილი.

ერექცია ნიუ-იორკში

ბიჭი

სან-ფრანცისკოში.

მთვარე სახურავზე,

ჭიები ბაღში.

მე ვქირაობ ამ სახლს.